Zaldai Mendi Taldea

iurreta2
Jada 6 urte pasa dira gazte talde bat batu eta Iurretako I. Mendi Martxa antolatu genuenetik. Baina taldeari izena ematen dion errekatxoak bezala badu bere ibilbide propioa eta erreka orok bezala bere emankortasuna ez da beti berdina izan.

Abadetxe Gaztetxearen garaian gazte batzuk Zaldai Mendi Taldea sortu zuten, errifa eta bestelako bitartekoen bidez rokodromo bat eraikiz eta eskaladaz gain hainbat ekintza burutuz.
Pare bat urtetako geldialdiaren ostean, gazte belaunaldi berriek hartu zioten erreleboa rokodromoa eraberrituz eta irteeraren bat edo beste antolatuz. Zoritxarrez, Abedetxea erre zenetik hainbat proiektu bertan bera geratu ziren eta tartean mendi taldearena.

Bizipen hauek gogoan hartuta eta Iurretan mendiaz gozatzeko aisialdiak zuen hutsunea ikusita, 2010-eko udaberrian mendia gustuko zuen taldetxo bat batu eta hala-nola mendi talde bat sortzeko ideiari forma emateari ekin genion.

Hau horrela, San Migel Jaiak gainean genituela ikusita, Jai Batzoardearen laguntzaz Iurretako I. Mendi Martxa antolatu genuen aurrez esan bezala. Antolatzen genuen lehen ekimena izanik, nerbioak airean, ondo irtengo ez zenaren beldurra, herriko jendeak zer nolako erantzuna izango ote zuenaren zalantza, euri txaparrada galanta eta atertzeko desio galanta… Azkenean 50 bat pertsona ausartu ziren euripean ibilbidea osatzen.

Ekimen arrakastatsua izan ez bazen ere, jendearen laguntzeko prestutasunak, animoek eta esker onak aurrera jarraitzeko indarrak eman zizkigun. Hemendik aurrera, beharrezko tramitazioak burutu eta 2011rako ekintzez beteriko egutegi bat osatu genuen jendearengandik jasotako ideiekin. Kosta ingurutik mendi irteera, auzoetako mendi martxa, eski irteera, Euskal Herriko txoko desberdinetara irteerak… Batzuetan lau katu eta beste batzuetan tropel handiagoa osatuz, hilero hilero irteraren bat egiten saiatu izan gara ordutik hona eta aurrerantzean ere horrela jarraitzeko ilusioa mantentzen dugu.

Bukatzeko eskerrak eman hasieratik lagundu gaituzuen bestelako elkarte eta norbanako guztiei zuek gabe ezinezko litzatekelako. Horrez gain, gogoratu nahi dizuegu Zaldaiko ateak zabal zabalik dituzuela, irteeretan parte hartu, edozein proposamen egin edo antolaketan gurekin batera bidea egiteko.